傳統年糕

過年當然唔可以少左傳統年糕

材料：

糯米粉 350g

澄麵 180g

蔗片糖 200g

水 230g


作法：

1. 水和蔗片糖先放進煲內，煮至完全溶解，放涼待用。

2. 把糯米粉及澄麵先過篩，最好過篩兩次。

3. 混合的液體逐少倒入粉類中，一邊加液體，一邊不停拌勻，直至完全混合無粉粒。

4. 麵糊加入一湯匙的生油攪勻後再過篩，可令麵糊更幼滑。

5. 在模具上掃上生油，倒進麵糊，用大火隔水蒸約 60至 75分鐘。

6. 年糕放涼後，放置到雪櫃冷藏。年糕先蘸上蛋汁，把兩面煎至金黃色及軟身，即可食用。


註：以上分量大約可做2個圓微波爐盤，另外所有液體和粉類的比例，最好是液體比粉類多約90G左右，可以在制作期間略略控制分量和甜度。

馬蹄糕

今次就係整馬蹄糕的時候，非常簡單方便

材料：

馬蹄粉 250g

冰糖 + 蔗片糖 350g

水 1500g

馬蹄 10粒

作法：

1. 馬蹄去皮，洗淨切小粒

2. 將250g馬蹄粉用750g清水開成馬蹄粉漿

3. 把750g水和糖先放進煲內，煮至完全溶解

4. 然後加入100g馬蹄粉漿及馬蹄粒，煮滾後熄火

5. 將餘下的馬蹄粉漿逐少倒入煲內，其間要不斷攪拌，攪至杰身

6. 在模具上掃上生油，倒進麵糊，用大火隔水蒸約30-40分鐘。

註：以上分量大約可做2個圓微波爐盤，另外因為我加入蔗片糖所以顏色比較深色，如要做出晶瑩透亮的效果，可以選用冰糖或白糖，注要分量，控制甜度。

甜品@皇子星級甜品

飯後諗住帶友人去金寶甜品........點知是日休息

我真係好彩到爆=.=

唯有係附近搵間糖水鋪，金滿堂同皇室甜品已經食過，加上勁多人等位

最後揀左皇子星級甜品...........點知真係出事了.......

價錢上係比其他甜品鋪平少少，價相都還可以，但味道真係好一般

我都唔記得lee個叫咩，類似係一個雜錦的撈撈，咩都有

小丸子，涼粉，雪糕，樣樣都有，但完全食唔出所謂的椰汁味，成碗都好淡

唯一可取的係個抹茶雪糕

心太軟，價相都可以接受，比上面的撈撈為好，都正正常常

不過都係硬左少少........都係靠球雪糕救一救佢啦


Well......皇子星級甜品都可以話係我係九龍城過的甜品最為平凡的一間

點解金寶甜品要休息呢>.<


皇子星級甜品: 九龍城太子道西448號太子匯11至13號鋪

飯聚@AppleGreen

臨過年前又係同朋友們團年一聚的時候

今晚就近近去左九龍城Apple Green, 話說佢開左咁耐,我都係第一次去

之前TST同MK個間無左之後, 都無食過了, 希望九龍城唔會有太大差別

Meun 依舊

今次同樣Order 左沙律，炸菌，明太子意粉，好彩味道無差到~~~好味

炸珍寶磨菇配黑松露忌廉醬

炸棒棒雞沙律

香蕉蛋糕

炸珍寶磨菇配黑松露忌廉醬，第一次食已經一食就愛上，所以太掛住，必點

菇菇炸到外脆內軟，一咬就就有啖啖的肉汁，配上黑松露忌廉醬，大愛

同埋分量真係超大份，同友人兩個人好似食極都食唔完........


炸棒棒雞沙律，order左半份，依舊新鮮，又有d脆脆，食落唔會好齋的感覺

香蕉蛋糕就記得係落order個陣request，因為request左先會奉上

我自己都係第一次食，超好味，甜甜的，有淡淡的香蕉味


明太子意粉，我唔記得左影相，之前食過幾款唔同意粉，都係覺得明太子最好味

同埋都係配大蝦先同明太子最夾！！！


Applegreen果然無令我失望，但真係唔知點解TST同MK兩間都要執....竟然係九龍城廣場開分店

九龍城店地方都幾大同闊落，坐得舒服，同埋真係無咩人去食

始終九龍城大部份都係一家大細同埋老人家，Applegreen並唔係佢地ge選擇

但我本人就好like，起碼lee間唔洗等位~~hehehe


Applegreen: 九龍城賈炳達道128號九龍城廣場B1層B107-108號舖

椰汁年糕

又到新年，又係蒸糕的時候

先整左椰汁年糕熱下身先

材料：

糯米粉 240g

澄麵 80g

冰糖 200g

椰漿 210g

水 200g


作法：

1. 水和冰糖先放進煲內，煮至完全溶解，放涼待用。

2. 把糯米粉及澄麵先過篩，最好過篩兩次。

3. 將椰漿倒入糖水中混合。

4. 混合的液體逐少倒入粉類中，一邊加液體，一邊不停拌勻，直至完全混合無粉粒。

5. 麵糊加入一湯匙的生油攪勻後再過篩，可令麵糊更幼滑。

6. 在模具上掃上生油，倒進麵糊，用大火隔水蒸約 60至 75分鐘。

7. 年糕放涼後，放置到雪櫃冷藏。年糕先蘸上蛋汁，把兩面煎至金黃色及軟身，即可食用。

生日飯@金蘭花

是日係媽媽大人生日，所以外出吃了簡單的生日飯

可以話由細去到大的餐廳，金蘭花泰國菜館，我個人覺得絕對好食過黃珍珍

Order左幾款每次都吃的菜式，可以話係充滿我地屋企人的回憶

糯米雞翼

炭燒豬頸肉

泰式拼盤

雜菜煲

糯米雞翼同豬頸肉一樣都係咁好味，糯米雞翼比以前進步左，無炸到咁硬

豬頸肉基本上每台都order的，like~~

拼盤就差不多，勝在樣樣都食到，雜菜煲就改良左，好香港人口味，有玉子豆腐~~

金蘭花除左好味之外，另一大賣點就係"不收加一，不收小費"，今餐4個人只係$300~~

所以都有一班捧場客，當日我地6點去到已經full了，6半點已經要等等等......

九龍城另一泰菜的選擇


金蘭花泰國菜館: 九龍城龍崗道10-12號

寵愛情人夢

今日去左睇寵愛情人夢，其實都幾接近入戲院前的期望ga la

一般大路的日本純愛片，講劇情同個故事，比較弱左少少

真係一套主力sell俊男美女的電影，成套戲勁多泛光唯美的近鏡，但真係太多.......

將男女主角都包裝到靚仔靚女，反而忽略左個內容

其實女主角的秘密唔需要咁早就暴光，到後面已經無左一種驚喜

鋪排上一早已經埋得太多伏線，一路睇只係故仔向前的推進，並唔係一步步去接近真相

結局其實可以係男主角流淚的一刻結束.......但偏偏又要........唉

當一套睇俊男美女的電影去睇，Fans們一定大滿足

但如果以一個觀賞劇情上的心態去睇，一定失望...........

香辣屋@cookedDeli by city'super

每次去City'super ge food court，基本上都會食lee間泰菜

Popcorn lee 個新開ge cookedDeli by city'super，同樣搵得到佢~~香辣屋

又平又大份又好味，菠蘿炒飯真係好誇張，5台有3台都有order ，又真係幾好味~~

泰式乾炒金邊粉 $48

菠蘿炒飯 $55

絕對係food court 的價錢，餐廳的質素


泰式乾炒金邊粉炒得夠乾身有鑊氣，又唔油，泰式風味十足

菠蘿炒飯，炒飯配上新鮮菠蘿、蝦仁、提子乾、腰果、肉鬆，啖啖的清新口感


其實真係只係坐ge環境係一個food court之外，食物真係比得上泰國餐館ge質素

價錢仲平好多，一個原個菠蘿炒飯，去泰國餐館無$80一定唔得，依家$55仲包飲品

去開City'super food court 記得唔好錯過香辣屋呀！！


香辣屋: 將軍澳唐俊街9號Popcorn 2 期 G50 cookedDeli by city'super

焗蕃薯

行過街市見到蕃薯好平，10蚊3磅，所以就買左返黎整自家焗蕃薯

好好味，而且超易整

作法：

1. 先把蕃薯洗凈，抹乾水份。

2. 待蕃薯乾了少少後，在表面上刺幾個孔，然後用錫紙包裹好，放入焗爐焗約25-30分鐘。

3. 焗起後可用筷子或牙籤插入蕃薯，如果可以容易穿透，即是己經熟透，要趁熱享用呀！


P.S. 每個焗爐的火力及蕃薯的大小都會影響烤焗所需的時間，可於烤焗約20分鐘後先看一看蕃薯的熟透程度而調節所需時間。

Lunch@Saizeriya Italian Restaurant

今日上openrice 無意search到深水埗都開左Saizeriya，所以就決定去食個lunch

上一次食已經係好耐之前係東港城食，平靚正

深水埗鋪係新開張無耐，十二點去到已經一堆人係到等位，好彩都唔洗等好耐

Saizeriya個格局都比較家庭式餐廳，坐得都算舒服，唔會話好迫咁

Order 左一個8" Pizza，一個意粉，一個焗飯，不過就無要drink bar，自助清水都可以了

可無限refill drink bar

卡邦尼意粉 $27

 意粉是怕乾爭爭唔夠汁，lee卡邦尼就無lee個問題啦，汁岩岩好，食落又唔會太膩

 Pizza反而我就覺得mama地，餅底太少茄醬，食落都比較硬

煙肉菠蘿Pizza $29

不過我鐘意佢俾埋個Pizza刀，可以自己自由分割幾得份都得

甜蝦多利亞 $27

甜蝦多利亞焗飯係超滿意，食落有啖啖芝士味，茄汁飯底

不過份量就少左d，女仔都唔太夠，男仔可能幾啖都食完.....哈哈哈

一行3人只係$83，超抵！！！

平價意大利意餐廳，而且上菜速度都好快，可以做到一個好流暢的turnover~~

下次黎到深水埗又有一個新選擇了


Saizeriya Italian Restaurant: 深水埗欽州街37K號西九龍中心4樓410號舖